Waxa La Joogaa Juun: 26ka Juun

 Waxa la joogaa 49 guuradii kasoo wareegtay maalintii ugu horreysay ee Dal Soomaaliyeed oo xor ah laga taago Calan soomaaliyeed oo xor ah. Waxana nasiib darro ah in maanta Isticmaarkii an ka qaadanay aqoonsiga iyo xorriyadda an hadana dib u weydiisanayno aqoonsigeena iyo xorriyadeena.

Waana wax laga xumaado. Waxa kale oo waxa laga xumaado ah in calankii an ugu hor taagnay Woqooyi isna loo tuuray Koonfur, lana hilmaamay halyeeyadii naftooda u huray gobanimadan qaaliga ah. Ilaahay an u barino inuu naxariistiisii janno ka waraabiyo Mujaahdiinta Runta ah ee la jihaaday gaalada, calankeenana iyo xorriyadeenana innoo soo dhiciyay. Sidoo kalana an Ilaahay u barinno inuu dalkeena Hooyo, ee maanta  dib ugu noqday gunnimmo iyo gumaysi, gobanimo garansiiyo, una gargaaro

.

 Hestan iyo laxankeeda, oo  labo sanadood ka hor an si  deg-deg ah u sameeyay ayaan ku xusayaa sannad guurada sannadkan.

 

Baydka Koowaad

Waa maalintaan Jinniyo
Jaan gumaysi tuurnee
Jeegada u laalneen
Jaaw nidhi Jirjiroolaha

Waa maalintaan Jidbiyo
Jacayl ku sallaaneen
Jaliiloow nidhi mahadaa
Noo Joojisay Calane

Waxa la joogaa Juune
Lix iyo Labaatankii Juune
Lix iyo Labaatankii Juune

Sida  U Jaxaastaa
Jalddiga Qardhaastoo
Johored weeyiye
Jidhka ku haystoo
Jal marna ka dhigta
Jinaw iyo dheefe

Waxa La Joogaa Juun
Lix iyo Labaatanka Juun
Lix iyo Labaatankii Juun
 

Baydka Labaad

Waa maalintaan Jirriqaagiyo
Jabiso Jidhif lihaydiyo
Abeeso Dhul Jiiftay
Jarnay hadimadoode

Waa Maalintaan Jabhadihii
La Jihaaday Gaalada
Jibbaarkeen uga barinay
Naxariistiisa Jannaade

Waxa La joogaa Juun
Lix iyo Labaatankii Juun
Lix iyo Labaatankii Juune

Jalbeebta heelada
Jiibsha Ciyaartoo
Jugta Wilwilaha
Kaga Jibaadshoo
Jeeniga isa saaroo
Salaan Jawaaboo

Waxa La joogaa Juun
Lix iyo Labaatankii Juun
Lix iyo Labaatankii Juune

 

 

Nabad iyo Caano Aynu Ku Ciidno

Abdiqani Ateyeh

 

hiildanyare@yahoo.com